જિલ્લા ચૂંટણી અધિકારી અને કલેકટર ડો.સૌરભ પારધીના અધ્યક્ષસ્થાને સ્વીપ, બેંક, દિવ્યાંગ, ખર્ચના નોડલ અધિકારીઓ સાથે બેઠક યોજાઈ
શંકાસ્પદ વ્યવહારો અંગે ચૂંટણી તંત્રનું ધ્યાન દોરવા બેન્ક મેનેજરોને સૂચના
જિલ્લા ચૂંટણી અધિકારી અને કલેકટર ડો.સૌરભ પારધીના અધ્યક્ષસ્થાને સ્વીપ, દિવ્યાંગ મતદારોને આપવામાં આવનાર સુવિધા તથા એકસપેન્ડીચર મોનિટરીંગ તેમજ બેંકના નોડલ અધિકારીઓ સાથે તબક્કાવાર બેઠક યોજાઈ હતી.
જિલ્લા સેવા સદનના સભાખંડમાં યોજાયેલી બેઠકોમાં જિલ્લા ચૂંટણી અધિકારીએ ગત ચૂંટણીઓમાં ઓછુ મતદાન થયું હોય તેવા વિધાનસભા દીઠ ૨૦ થી ૨૫ મતદાન મથકોનો સર્વે કરીને મતદાન ઓછુ થવાના કારણો જાણીને વધુમાં વધુ મતદાન થાય તેવા પ્રયાસો હાથ ધરવા જણાવ્યું હતું. કોલેજો-યુનિ. ખાતે જનજાગૃતિ કાર્યક્રમોનું આયોજન થાય, રેલી, મેરેથોન દોડ, ઈન્ડસ્ટ્રીઝ વિસ્તારમાં શ્રમિકોમાં જાગૃતિ માટે કરવામાં આવી રહેલી પ્રવૃત્તિઓની વિગતો સ્વીપના નોડલ અધિકારીએ આપી હતી. આ ઉપરાંત, દિવ્યાંગ મતદારોને વાહન, વ્હીલચેરની સુવિધા ઉભી કરવા અંગે ચર્ચા કરવામાં આવી હતી.
ઉમેદવારો દ્વારા ચંટણી દરમિયાન કરવામાં આવતા ખર્ચની દેખરેખ માટે નીમવામાં આવેલા કસ્ટમ, જીએસટી, આઈટી, એકસસાઈઝ તથા અન્ય નોડલ અધિકારીઓ સાથે બેઠક યોજીને નિયત કરવામાં આવેલ ભાવ મુજબ ખર્ચ થાય છે તે અંગે દેખરેખ રાખવા તેમજ શંકાસ્પદ ચીજવસ્તુઓ, રોકડની હેરફેર અંગે ત્વરિત ચૂંટણીતંત્રને જાણ કરવા અંગે જણાવ્યું હતું. બેંકોમાં ૧૦
લાખથી વધુ બેન્ક ટ્રાન્ઝેક્શન, શંકાસ્પદ નાણાકીય વ્યવહારો પર ઝીણવટપૂર્વકની નજર રાખી જે ખાતામાં સામાન્ય લેવડદેવડ થતી હોય તેમાં અચાનક વધુ લેવડદેવડ થાય તેવા ખાતાઓ પર વિશેષ નજર રાખવા માટે બેન્ક અધિકારીઓને જણાવ્યું હતું. સામાન્ય નાગરિકો તેમજ અન્ય કોઈને બિનજરૂરી કનડગત ન થાય તેની તકેદારી રાખવા કલેક્ટરશ્રી દ્વારા અનુરોધ કરવામાં આવ્યો હતો.
બેઠકમાં કાયદો અને વ્યવસ્થાના નોડલ અને પો.કમિશનરશ્રી વાબાંગ જમીર, ખર્ચ મોનિટરીંગના નોડલ અધિકારી અને જિલ્લા વિકાસ અધિકારી શ્રીમતી શિવાની ગોયલ, એમ.સી.સી.ના નોડલ અને ડે. મ્યુ.કમિશનરશ્રી આર.એમ.પટેલ તથા અધિક જિલ્લા ચૂંટણી અધિકારી શ્રી કમલેશ રાઠોડ તથા જુદા જુદા વિભાગોના નોડલ અધિકારીઓ ઉપસ્થિત રહ્યા હતા.
